بھديك بيتين شعر وانت تستاھل

[نجد2]

اهليييييييين جورج ي مرحبا والله وين غيباتك ووشو اللي ليا شفت الجو تغير بقول ونكمل قصصنا القديمه ترى مافهمت شي..


طمني عليك ان شاء الله صحتك تمام.. وكويس اني صدتك ع اخر السنه شكلك تبي ختامها مسك..


يلا انتظر شرحك ي استاز جورج..

ايوه ودعواتك بكره عندي مقابله مصيريه اذا عديتها ان شاء الله بنقبل بوظيفه حكوميه مررره كويسه بالنسبه لي.. واذا لا سهالات امر الله من سعه ان شاء الله..

[سواها قلبي]

اهليييييييين جورج ي مرحبا والله وين غيباتك ووشو اللي ليا شفت الجو تغير بقول ونكمل قصصنا القديمه ترى مافهمت شي..

ههههههههههههههه حلوه اهلين جوررررررررررررج طالعة مثل العسل من بؤج واهلين وسهلين فيج بنت عمي مساج الله بالخيرات


بنت عمي ما ادري شقولج اخاف تضحكين علي تو مساع قاعد اصلي الظهر وانا اسبح يئ اسمج جدامي نجد كملت التسبيح وييت البيت تغديت وقلت امبييييييييييه ليكون ردت علي وانا منتبهت ويوم دشيت المنتدى لقيت كلامج وضاق خلقي

وربي العظيم شفت اسمج تحت واقول بيني وبين نفسي هذي وينها يمكن اجازة وراحت عند اهلها الغايب حجته معاه بعدين راح اسمج من تحت اختفى وانا قاعد اطالعه ولا خطر على بالي انج راده علي اي وربي العظيم الا تو مساع انتبهت مخي مو معاي قمت اضيع وانسى مرات مخي يوقف


وان شاء الله توفقتي بالمقابلة يا رب واللي كاتبه الله بصير وان شاء الله خير

واذا لا سهالات امر الله من سعه ان شاء الله..

طمني عليك ان شاء الله صحتك تمام..

انا ولله الحمد ابخير وعافيه من الله

وكويس اني صدتك ع اخر السنه شكلك تبي ختامها مسك..

وانا اقول اشفيني جتفي يعورني اثاريج اموصوبتني ابسهم سام ههههههه

ووشو اللي ليا شفت الجو تغير بقول ونكمل قصصنا القديمه ترى مافهمت شي..

قصدي سوالفنا قبل لا اقيب كانت فيها ضحك وغشمرة ووناسه ويوم قبت صارلي شي ومو وقته اخرب هالجو لا وبعد يوم ما انتبهت لردج اعفست السالفة فوق تحت والله يستر وانا خايف لا باجر اسولف مع الساحره فضيلة الشيخة ام عبدالقادر ولا مع ام عبدالجبار العجمي عبالي اسولف معاج يعني معقوله اشوف اسمج وماارد عليج اكيد فيني شي يمكن اسحروني هالسحره وربي انا مستحي منج

باجل السالفة بعدين خنشوف اول نتيجتي بعد ما اعترفت لج اني ما انتبهت لج وبعدين يصير خير احنا ليش نستعيل

[نجد2]

اهلين

البارح كتبت لك رد بس ششكلي نمت قبل لا اعتمد الرد ههههه

بحاول اعيده
بخصوص انه تفكرني باجازه ورايحه مكان انا دايم انتظر ردك وارد عليه مهما كانت ظروفي فلاتظن هالظن ابد..

وتبي الصراحه مررره حز بخاطري موضوع انزالك مواضيع ومارديت علي انا بهالقسم.. بس كنت اقول يمكن كل مره ينزل موضوع يكون منشغل ويبي يرد ع رواقه ومن هالتفكير.. بس كل مره تنزل شي وكل ماله اسمي ينزل تحت وي القسم.. شعور سي بس ابد ما فكرتم قاصد بس يبقى يحز بخاطر الشخص المده الطويله من الانتظار..


ممممم المهم انت معذور بكل وقت وعلى اي شي مممن تسويه فلا تشيل هم ولا تحاتي..



يلا هات السالفه اتوقع شبعنا تاجيل ههههه

[سواها قلبي]

يلا هات السالفه اتوقع شبعنا تاجيل ههههه

لا لا صبر خنخلص من هالمشكلة وبعدين نروح للسالفة عاد اشدعوا السالفة زينه

شعور سي بس ابد ما فكرتم قاصد بس يبقى يحز بخاطر الشخص المده الطويله من الانتظار..

ادري وربي كلامج صح بس لو تدرين انا اشكثر ضاق خلقي وتاثرت وايد وايد جان بجيتي على حالي وانا يوم قلت لج مخي وقف صج مو غشمرة وخاصة يوم رديت عليج احس انه ابينفجر مو عوار راس لا الله يستر ما يطلع معاي ضغط وانا ما ادري

وكلامج صح مرات اشوف ردج وما ارد عليه واجله لباجر يكون يمي احد او شي ثاني بس انتي تعتقدين اني اقعد جم يوم وما ارد عليج الحمدلله ماكو زعل ولا شي اللي يخليني ما ارد وانا قايلج ترا الحادث اللي صارلي اثر على الذاكرة

المشكلة شنو اني شايف اسمج تحت ما يئ على بالي انج راده وخالصة كنت اقول وينها ماردت وكل ما نزعلت موضوع اشوف اسمج ينزل ورب الكعبة اللي قلته لج صح وللحين افكر اشلون ما انتبهت تعتقدين ساحرتني ام عبدالقادر من كثر ما ادش واسولف معاها

اي شي مممن تسويه فلا تشيل هم ولا تحاتي..

لا احاتي ليش ما احاتي بس صج فشلة وانا اسف


وهذا هدية مني لج



https://k.top4top.io/m_1467pe0gv1.mp4

[نجد2]

اول شي لاعاد تعصب ولا يعورك راسك ولاشي الدنيا سهالات
ومسموح ومعذور وعادي تصير ودام القلوب طيبه خلاص مهما صار ماتتغير..

ويلا خلصت السالفه الحين هات سسسالفتك ولا تتاسف ولا تحاتي مره ثانيه وارجع اقولك الدنيا سهالات اهم شي صحتك ثم صحتك.. ولاتقول ساحرتني مدري شنو ترى احس مو زين ينطرون هالاشكال ربي يكفينا شرهم ولا تسولف وياهم حتى لو من باب طقطقه..



شهالهديه وين راح هذا بداهيه ههههههه قاعده انتظر يطلع متفحم اتاريه هذي شغلته لاعادت من شغله هههههه استغفر الله..

[سواها قلبي]

قاعده انتظر يطلع متفحم

هههه انتي شوفي اللي فازع ليه لو انا ابمكانه ما تحركت ادري انه بيطلع من نفسه من الحراره مثل ما طلع هههههه

ربي يكفينا شرهم ولا تسولف وياهم حتى لو من باب طقطقه..

الله يكافينا شرهم يا رب

شوفي بنت عمي هذولا انا ماحبهم من يوم كنت ازغير اكرهم مع اني ما افهم ازغير اهم دجالين خربوا ابيوت وفرقوا بين الناس دمروا حياتهم عشان ياخذون بس جم فلس والحين موضه يديدة يسوي نفسه شيخ ويقرا جم آية عشان اتصدقين انه شيخ

مرة من المرات سافرت مع واحد من الشباب ماني ذاكر اسم الدوله اهو صاكينه ابعين وقالي نعال معاي يقولون انه في شيخ اهنيه يقرا سالته وين مكانه قالي تقريبا فوق هالجبل قلتله انت من صجك هذا ساحر
المهم انا متنرفز داش اب شري وصلنا المكان ولا في ناس قاعدة ناطره دورها سالنا وين الشيخ قالوا قاعد يصلي اعتقد اللي ناطرين دورهم طعم ههههههههههه اشلون عرفت خلونا اندش قبلهم

دشينا ويانا الدجال سال جم سؤال جان اتهاوش معاه صراخ وربي ماقدرت امسك نفسي ورفيجي ماسكني خلاص يلا خنطلع واللي ناطرين دورهم دشو علينا شفيكم قلتلهم هذا ساحر وجذاب مو شيخ المهم طلعونا من باب ثاني وتناجر مع رفيجي وزعلت عليه ومن باجر يوم هديت قمت اضحك واقوله زين ما سحرنا ولا سوالنا شي ههههههههه

وانا لما اسولف مو حبا فيهم لا بفضحهم الله يفضحهم لان فيه ناس عبالهم صج شيوخ واهم سحره ويضحكون عالناس والساحر من يسالج عن اسم امج اعرفي انه هذا ساحر وبعضهم يسالون الواحد عن اسم ابوه اول مرة ويقعد يسولف معاه وبعدين يساله عن اسم امه لان اسم الام يهمه ومنه يعرف كلشي عن المريض

وسالفتي بعدين بقولها لج لانها حزينة

[سواها قلبي]

صليت الفير مع واحد من ربعي وهذا اعز اعز اعز واحد فيهم على قلبي وكل ازغيره وجبيره فيه اعرفها انام عنده بالبيت ايام واكل واشرب واهو نفس الشي ينام عندي ايام وياكل ويشرب طلعنا من الصلاة وقالي انا يوعان مشتهي باجه قلتله انت تننسى قالي يالله خنروح قلت انا فيني النوم بروح اتسبح عشان اطير النومه وبعد ساعة بمرك

وصلت بيتهم واتصلت ما شاله وقلبي ناقزني في شي مو طبيعي ومثل العادة عندي مفتاح بيتهم دشيت وتنحنحت وسيده لغرفته عبالي نايم ومثل العادة اذا دشيت غرفته احط جوتييي برا عشان اهله يعرفون اني عنده

شوي واسمع وحدة تبجي وبطلت الباب ودشت علي واهي تقول اخوي مات مات ابصوت عالي انا طحت على فراشه ولا حاس بالدينا اول مرة يصير فيني جذي يمكن لانها ارعبتني بصارخها وفاجأتني بالخبر ماني عارف شسوي ماني امصدق قعت اطالع الباب وانا نايم على ظهري الحين يدش علي لا لا هذا حلم قعت استغفر واسبح واقرأ قرآن وجان اتذكر التلفون واتصل عليه اكثر من 20 مرة وما يرد شوي وتبطل الباب ولا اهي امه الويه اصفر ماكو دم ودموعها تنزل على خدها وقاعدة اطالعني وساكته اكسرت خاطري جان اقولها بالغلط وخانقتني العبرة اشفيج ( يمه ) العادة اناديها خالتي وما تمالكت نفسها وطاحت عالارض شالها اخوها وبناتها كانوا وراها واقفين خذوها للصالة وانا قعت بالغرفة محتار شسوي

وبعد ما هدت شوي يتني مرة ثانيه قالت يولدي طلبتك لا تردني قلتلها يمه انفذه من هالدقيقة قولي وانا حاضر قالت انت ابروحك بالبيت وابيك تنام عندي تاكل وتشرب مثل قبل وخلك طبيعي واتغشمر معاي انا ان شفتك شفت ولدي وهديت لا تخليني وتروح تكفى تفكى هذا ملحقه محد يمك وهذا تلفونه ودق علي منه ريلي مات وولدي مات وانت الحين كلشي لي اب هالدينا توهقت ووافقت

قمت اتصل عليها واهي ماتخليني هم تتصل ابكل وقت يمه ابي هالطبخة يمه ابي عشاي جذي يمه عندي الربع اليوم يمه ويمه وردت الروح فيها اشوي والحمدلله عندها خدم وطباخة وانا اعرف كلشي عنها رفيجي امعلمني ازغيرة وجبيره عنها حتى اهي عندها دوا تاخذه قبل النوم كله تنساه ويتصل عليها الله يرحمه ويذكرها والحين انا اخذت دوره هم ادق عليها ابنفس الوقت يمه الدوا اخذيه تراني عادهم واذا ما كلتيها انا باكلها وتضحك الله يصبرها وهذي السالفة كلبوها